政情：Greg蘇唔識撈 建制拒護航
建制派喺今屆立法會罕有地團結，先後攻下立法會大會、內務委員會同財務委員會三大主席位，連之前同泛民平分秋色嘅多個事務委員會主席位，今屆亦要霸足四年。不過亦有漏網之魚，例如建制派唔去爭資訊科技及廣播事務委員會嘅主席，今屆四年任期都唔會染指該委員會，因乜解究佢哋會咁益泛民呢？消息人士透露，原來係同商務及經濟發展局局長蘇錦樑（Greg）有關。
出身民建聯嘅Greg蘇，入政府前係該黨副主席，當初加入政府做副局長時，民建聯內部對佢好有期望，之後佢爆出卡片風波，該黨亦無條件力撐，無奈幾年下來，Greg蘇被指過度鐵面無私，成日掛住同泛民溝通爭取支持，對於建制派、包括一手湊大佢嘅民建聯，反而就較為疏離，無乜好嘢益過佢哋。
埋怨蘇無幫手拉票
有人甚至認為，前任資訊科技界議員、建制派嘅譚偉豪今屆低票落選，其中一個原因亦係Greg蘇太過公正無私，無好似某啲政策局長咁，向相關業界組織同選民上下埋手，暗助建制派嘅候選人拉票，令佢哋覺得Greg蘇已經唔係「自己人」。
各個政策局喺立法會選舉結果公布一刻，已立即開始打電話畀各大建制派，游說佢哋派人加入佢哋嘅對口立會委員會，以便未來四年夠人幫手護航，有啲局長更加連委員會主席人選都畀埋意見。據聞Greg蘇亦有打電話畀建制派，游說佢哋加入資訊科技委員會同角逐主席，但反應冷淡，Greg蘇真係要好好檢討吓，唔通佢欠缺呢屆政府好重視嘅政治能力？
需拆幾個政治炸彈
資訊科技委員會過去大部分議程都僅與業界有關，重要性一向無政制、保安同教育等事務委員會咁大，但今屆卻有幾個政治炸彈需要處理，例如現已爆發緊嘅香港數碼廣播停播事件，多名泛民都已講到明會跟進。另一更敏感嘅，就係增發免費電視牌照事宜，不僅涉及新聞言論自由等政治問題，仲牽涉到多個大財團嘅利益，影響層面更廣。建制派呢場大戲，最終會唔會玩出火，會唔會喺重要關頭出手相救，答案唔使好耐就會揭盅。