中環出更：煮飯公純官刨番梘冇失手
周大福慈善基金名譽理事長兼新世界發展主席鄭家純同政務司司長林鄭月娥等，尋日擔任「社區新世界」社區中心主禮嘅嘉賓，佢哋齊齊學洗手七部曲同整環保番梘。卓妮見純官手起刀落，幾下手勢就將舊番梘刨碎，佢笑言自己喺屋企煮開飯喎。
周大福慈善基金及香港社區組織協會共同成立嘅「社區新世界」社區中心，尋日正式啟用，目標協助基層脫貧。今日係「全球洗手日」，所以大家齊來學洗手同整番梘。整番梘要將番梘碎加水重塑形狀，原來純官識得刨番梘，對住一個唧壺卻雞手鴨腳，仲唔小心將個壺嘴掉轉咗唧錯隔籬。最後純官做咗塊心形嘅番梘，佢笑稱呢塊係「愛心梘」喎。
身兼扶貧委員會籌備小組主席嘅純官，今次資助逾千萬元捐建呢個位於深水埗嘅中心，佢謙稱自己做得幾多得幾多，借呢個善舉牽頭，鼓勵善長回饋社會。