中環出更：雷禮權飛瑞士醫牙
尋日沙田馬場舉行莎莎婦女銀袋盃賽，又係女士們爭妍鬥麗嘅好時機，不過竟然畀一位男士搶咗唔少風頭，佢就係拖實活動嘅女主人、莎莎國際老闆娘郭羅桂珍隻手大唱情歌嘅九巴後人雷禮權（William），佢太太利蘊珍（Marie）仲奪得最佳衣着獎冠軍添。William話佢下周會飛瑞士睇牙醫，原來William有瞓覺磨牙嘅習慣，就算戴住牙套瞓，都依然磨到蝕晒，所以要定期補牙咁話。飛到瑞士咁遠睇牙，皆因William喺嗰邊有牙醫同佢睇慣睇熟，知道晒佢嘅需要。
莎莎國際老闆郭少明（Simon）及太太郭羅桂珍、囡囡郭詩慧（Melody）及女婿陳振邦（Davis）一家大細當然都有出席，Davis手抱七個月大嘅囝囝Jacob，着咗套Junior Armani帥氣十足，Davis自己都唔執輸，穿上自家設計嘅毛毛領西裝，佢笑言呢件係「Davis」牌喎。Simon話今個黃金周生意升咗兩成，好滿意業績。
蔣麗芸揀帽甜蜜蜜
新進立法會議員蔣麗芸（Ann）上任後好忙，特意拖埋老公梁海明（Raymond）入馬場輕鬆吓。一身艷紅打扮嘅佢，入場先至即興買禮帽，左睇右睇，最後揀咗一頂紅色嘅。身邊嘅Raymond充分發揮紳士風度，爽手碌卡埋單，盛惠一千八百多元，佢話使錢唔緊要，最重要太太開心，真係sweet到暈。
中華總商會會長蔡冠深太太蔡關穎琴（Janice）同愛女頌思（Jocelyn）孖公仔現身，Janice笑言愛女最後揀咗留港升學，令佢安樂晒。
講番個盃賽，由「造紙大王」李運強公子李文恩隻「包裝博士」奪冠，穩袋百三萬獎金，卓妮記得佢兩周前先拉過頭馬，認真行運一條龍。
卓妮