如果功夫茶問大家，生果金係扶貧定係敬老？相信大家都識得答，每月區區一千元點扶貧吖，梗係敬老喇。冇錯，咁如果功夫茶再問大家，每月二千二百元嘅特惠生果金又係扶貧定係敬老吖？呢個問題就有排拗嘞，政府強調特惠生果金係扶貧措施，而唔係敬老，所以要引入資產申報制度，但好多政黨及工會就唔同意，堅持要求豁免申報資產，否則就唔批准撥款，雞同鴨講，你話點算！
即係咁，免申報資產，令所有老人家都可以享受特惠生果金，梗係皆大歡喜喇，問題係隨着人口愈來愈老化，公共財政長期可唔可以承擔呢？日後會唔會無以為繼呢？呢啲問題唔能夠唔考慮o架。所以咯喎，部分立法會議員近日轉變口風，將特惠生果金與全民退休保障掛鈎，要求政府承諾推行全民退保，先至會支持申報制度咁話。換句話講，呢個問題仲有得傾，關鍵睇政府點做啫。
嗱，政務司司長林鄭月娥就話嘞，計劃喺即將成立嘅扶貧委員會旗下，增設由佢擔任主席嘅小組，專責研究全民退保。咁講啦，全民退保事關重大，牽一髮動全身，唔係一朝一夕可以搞掂，所謂研究，隨時要十年八載都似，但相對於前朝政府左推右搪，一拖再拖，現屆政府肯着手研究，無論結果係點，總算向前行出咗一步。講真，大多數香港人係理性嘅，唔會蠻橫無理，更加唔會要求政府聽日就落實全民退保，只要當局講到做到，認真研究，市民係願意等嘅。
係人都知，香港嘅退休保障制度天殘地缺，話就話有三條支柱，即係所謂強積金、個人儲蓄同埋綜援安全網，可惜呢三條支柱名不副實，根本冇一條靠得住。就講強積金吖，管理費又高，回報率又低，打工仔辛辛苦苦供款，到頭嚟淨係養肥班基金經理。就算下月起可以「半自由行」，咁又點吖，咪又係換湯唔換藥，靠強積金維持退休生活喎，餓死都未天光喇！
有因就有果，香港好多社會矛盾尤其係老人問題，就係因為缺乏退休保障而引起，唔怪得要求推行全民退保嘅聲音愈來愈強烈喇。講到底，生果金又好，特惠生果金又好，或者強積金又好，無論當局點樣修修補補，變來變去，都解決唔到老人問題，要做到人人安享晚年，個個無後顧之憂，始終都要研究推行全民退保，呢個問題避唔到o架。
計功夫茶話齋，香港係一個富裕社會，到依家仲未有一套完整嘅安老政策及退休保障，搞到唔少長者老無所依，老無所養，講出嚟都失禮死人喇！