新一屆立法會嘅首兩項動議辯論，將於周三下午進行。同樣主力勞工基層嘅工聯會同工黨，都好想成為第一個就標準工時立法提出動議嘅政團，最後工聯會爆冷抽籤輸咗畀工黨，後者委派本身代表社福界嘅張國柱提出立法規管工時動議。工聯會事後似乎唔多忿氣，派出勞工界立會新丁郭偉強提出修訂，修訂內容等同騎劫咗張國柱嘅原動議，唔通係有心報復？
郭偉強嘅修訂，將張國柱嘅原動議案放咗喺最後面，前面就加咗大堆工聯會對立法規管工時嘅詳細建議同具體落實方案，連成立委員會研究工時立法嘅具體組成，幾時諮詢、幾時交報告等，都列得一清二楚，修訂新加嘅字數係原動議八倍，「妹仔大過主人婆」。
除咗郭偉強之外，仲有三名立會新丁都有就該項動議提出修訂。其中同樣來自商界嘅民建聯蔣麗芸同新民黨田北辰，都要求當局先廣泛諮詢各界，等達成共識後先立法。而表明對工商經濟政策立場有別於其他泛民嘅公共專業聯盟梁繼昌，就建議當局延至下個立法年度先提交相關嘅條例草案，唔似工聯會同工黨咁，堅持要喺本年度內立法。