民建聯北區區議員劉國勳因為喺特首選舉中力撐梁振英，不但畀人稱作「第一梁粉」，仲一度傳佢會辭去區議員議席，加入梁振英政府做政治助理，不過佢最終都係留低繼續做地區。劉國勳近日仲發起咗個「助養勳勳」行動，呼籲街坊捐錢畀佢做地區工作，身為區議會「票王」嘅佢，因乜咁慘情？
劉國勳話，區議員每月營運資助只有二萬二千幾蚊，未計其他雜費，扣除兩位助理人工同辦事處租金，只係得番幾百蚊，現時每月平均要私人倒貼二、三千蚊，先可以處理到佢辦事處數以百計嘅求助同投訴個案。
通脹加上最低工資水平提高，最近兩位助理亦要求劉國勳加人工，因此被迫要向街坊求助。佢笑言今次呢個助養行動，好有可能係全港首創，以前都未有區議員做過，有粉絲為咗幫佢打氣，更加幫佢整咗張熱爆全球嘅韓國歌手Psy《江南style》改圖。不過助養行動依家仍處於構思階段，因為盤數一定要好清晰，否則實會畀別人質疑落格。