政情：陳智思揼本印拉頁宣傳
人稱「公職王」嘅行政會議成員兼港區人大代表陳智思（Bernard），早排盛傳因公司工作及其他本地公職太忙，考慮放棄參加喺年底舉行嘅港區人大選舉。不過我哋剛剛收到Bernard新一期個人通訊，發覺唔單止紙質同印刷靚咗，仲精心設計拉頁，刊出超過三十張個人靚仔相同活動照片「晒冷」。製作咁揼本，唔通佢回心轉意，想為年底競逐人大連任而做好準備？
每兩至三個月出版一次嘅《陳智思通訊》，平時只有簡單四至六版紙，但今期第二十七期通訊，就加碼製作至十版，全部用優質粉紙印製，個人同活動照片明顯比之前多，最尾更新增一版拉頁。Bernard習慣將自己以唔同身份嘅工作同活動，喺通訊中分門別類介紹，過往有關港區人大嘅工作，一般只用一至兩版介紹，但今期就加料到三版，想唔話佢有意為角逐連任人大鋪路都好難。
其實Bernard今年只有四十七歲，最近一次港大民調更顯示，佢係民望最高嘅現任行會成員，咁快就唔選人大實在有啲可惜，對香港同內地都係一個損失。