政情：長毛范國威各師各法
立法會除咗逢星期三開會嘅大會同逢星期五開會嘅內會財會，仲有十八個專責討論唔同政策範疇嘅事務委員會，都頗受公眾關注，係博見報爭曝光嘅好場所。喺立會內議席較多嘅黨派，自然可以分工合作，每人加入幾個委員會。但係對於啲「一人黨」議員，就真係有三頭六臂都搞唔掂，惟有各師各法應付。好似社民連梁國雄（長毛）咁，就一個頂十個，加入咗足足十個事務委員會。同佢一樣來自新界東嘅新同盟范國威（Gary），就「貴精不貴多」只係加入三個，唔怕畀人話佢偷懶。
多達十八個事務委員會，要去晒真係冇咩可能，一眾「一人黨」議員惟有自己取捨。其中長毛就一口氣報名加入十個委員會，交通、房屋、政制、保安、教育、司法樣樣都有佢份，當正自己十項全能咁，希望佢唔好開三分鐘會，發完言掟完嘢就走人喇！另有八名議員分別加入咗八個委員會，包括立會新丁建築界嘅謝偉銓，好耐都無見有功能界別議員咁勤力囉。
大懶蟲發叔 都有三個會
同長毛一樣喺新東直選跑出嘅單丁議員Gary，就只係加入咗交通、發展同環境三個事務委員會，專注新東居民最關心嘅交通問題、新界東北發展計劃同將軍澳堆填區問題，委員會數目連長毛嘅三分一都無。
除咗Gary，仲有六個議員都淨係加入三個委員會，好似出咗名係立會大懶蟲嘅鄉議局劉皇發、需兼顧內會同財會主席工作嘅經民聯梁君彥同自由黨張宇人，以及工聯會嘅黃國健（KK）同陳婉嫻、衞生服務界嘅李國麟。工聯會今屆有成六名議員，KK、嫻姐同另外四人分工合作，亦屬合理。李國麟就繼續集中精力，主打佢最關注嘅衞生、食物安全政策，以及大家都關注嘅房屋範疇。
政制委員會最多人參加
同上屆一樣，咁多委員會之中，最多人入會嘅係政制事務委員會，有卅七人咁多，即有過半數議員加入。司法及法律同發展事務委員會，亦分別有卅四同卅一人加入。其中公民黨同經民聯嘅梁美芬力爭做主席嘅司法委員會，建制派有十九人，泛民只得十五人，扣埋未完成宣誓程序嘅人民力量黃毓民，更加只剩十四票，如果鼠王芬咁都選唔贏，真係要自己檢討吓囉！