中環出更：善學基金籌款名人出錢出力
已成立十八年嘅善學慈善基金，日前舉行「善學彩眼獻關懷」慈善晚宴，基金創辦人兼城中名媛趙曾學韞開心又感動，因各界好友慷慨解囊支持，連大美人林青霞都豪捐五十萬元。當晚數以百計城中名人現身，其中有唔少稀客，包括藏傳佛教禪修大師兼文成公主國際基金主席夏鉑坦真仁波切（Shyalpa Tenzin Rinpoche），同埋清朝皇室後裔愛新覺羅．包鏞，愛新覺羅仲穿着王爺袍穿梭全場。
趙太老公恒興業集團主席趙善簪、醫管局主席高永文都去捧場。趙太話，今次籌款嘅受益機構，係微笑行動基金以及文成公主國際基金。善學基金成立以來，已支持逾三百個慈善組織，一直堅持零行政費用支出，真正善用每一分每一毫善款。趙太特別感激贊助場地及餐飲嘅富豪酒店，幫基金慳番八十幾萬元開支。
卓妮見到博愛醫院副主席陳李妮（Lily）、前主席湯修齊（Henry）及前副主席黃小雄都喺度，原來Lily有份搞籌款活動，而Henry就係受益機構微笑行動嘅總理。
陳李妮奪《媽媽的愛》
兩人唔止買枱力撐，Lily仲成功投得七歲小朋友嘅畫作《媽媽的愛》，笑稱最近啱啱搬寫字樓，打算掛喺新公司細味欣賞。當晚Henry由深圳趕返香港出席活動，佢話近日將跟隨基金去廣東肇慶，為二百幾名小朋友做兔唇手術。愛新覺羅．包鏞就捐出《百龍圖》字畫供拍賣，佢係唯一結合漢文及滿文嘅少數民族書法家，難怪大作成為當晚競投嘅焦點之一。
卓妮