雖然話女人貪靚，甚至去到愛靚唔愛命嘅程度，之但係咁，唔愛命只不過係一種誇張講法啫，冇人真係會為咗扮靚靚而犧牲寶貴生命嘅。所以咯喎，以美容之名搞到人哋冇咗條命嘅負責人，真係罪無可恕到天地不容o架！
話說有一個DR醫學美容集團，為顧客提供所謂醫學美容服務，卒之好衰唔衰，搞到四名女顧客接受療程之後出現敗血性休克或者敗血病。其中四十六歲入住律敦治醫院深切治療部嘅女病人情況最差，肝同腎等等多個器官衰竭。另一名同樣入住律敦治醫院嘅五十六歲女病人不遑多讓，病情亦係非常嚴重。到頭來，四十六歲女病人淪為枉死城下又一冤魂，搶救無效溘然離世。醫生話死者血液樣本發現抗藥性好強嘅膿腫分枝桿菌，呢種菌好難醫治。
女病人仍然一息尚存嘅時候，食物及衞生局局長高永文係咁講嘅：「好擔心四名病人嘅性命安全，會徹底嚴肅調查事件，查個水落石出，唔會放過任何要負責嘅人。」好嘞，家陣搞出人命嘞，麻煩局長大人兌現承諾，千祈唔好放過任何要負責嘅人，否則死者泉下有知，或者唔會放過高局長。
高永文另外又話，將會循兩方面跟進事件，包括明確規定高風險療程必須由註冊西醫及專業醫護人員負責，並於指定場所進行，以及不排除立法規管美容院，稍後向立法會交代。
唉，其實講到尾，咪就係冇立法規管累事囉！
等功夫茶講多次，咪就係冇立法規管累事囉！
喂，呢單畸屎牽涉嘅療程好鬼死複雜o架，又要抽取血液，又要注射血液，中間唔知邊個環節出錯，咁就害到人哋小命不保，非常之咁冇陰功啫。既然療程複雜成咁，有乜理由冇規管嘅呢？
對於今次事件，香港醫學會發表聲明，強烈要求政府盡快將聲稱可提供醫療美容，以及其他醫療服務嘅機構人士納入法例規管範圍，立法界定何謂醫學治療，以保障市民健康。醫學會又呼籲同行，必須遵照專業守則，不應與非專業嘅機構同人士喺業務上有任何聯繫。醫學會會長謝鴻興講得啱o架，對於上屆政府唔肯立法規管醫療美容集團感到遺憾，如果及早立法就唔會有同類事件發生。
嗱嗱嗱，高永文唔好下巴輕輕呀，必須嚴肅處理一眾相關人等。家陣確係有人死於非命，求神拜佛死亡人數唔好增加添喎，相關責任人唔可以放過o架，如果你告佢誤殺，功夫茶唔會反對囉。
即係咁，醫學美容害到有人枉死，無規無管實在太無天理。高局長，做嘢啦，小心市民唔放過你！