本身係東區區議會主席嘅民建聯立法會議員鍾樹根，早前成功當選後公開話，一定會辭去區議會主席個位，交棒畀班地區嘅兄弟姊妹。當選至今已經超過一個月，樹根仍未辭職，原來係民建聯內部有三位區議員都有興趣爭做主席，至今未能協調成功。
據了解，樹根「當選辭主席」原來係佢嘅選舉承諾，藉以得到地區黨友全力支持，為咗盡快搵出區議會主席嘅接任人，民建聯內部早就開始積極協調，但至今仍然未掂，黃建彬、周潔冰同龔栢祥三位民建聯區議員都想爭取呢個席位。據講，三人之中，暫時以黃建彬呼聲較高。
黃建彬現時係區議會副主席，再上層樓機會自然大啲；至於有一定知名度嘅周潔冰，由於加入民建聯時間唔算太長，要喺民建聯全面控制嘅東區區議會當選，機會自然比較細。除咗主席位外，有傳工聯會希望爭取做副主席，以免民建聯繼續獨大喎。