政情：徐英偉陳岳鵬落力派片
立法會尋日宣誓，成功冧莊做民政事務局局長政治助理嘅徐英偉（Caspar）以及由特首辦轉戰政制及內地事務局做局長政治助理嘅陳岳鵬（Ronald）都有現身，佢哋咁落力，唔通有秘密任務？
Caspar話，第一日就落立法會，主要係認識啲新議員，不過就唔係問議員拎電話，因為政府一早就有，佢落嚟反而係要派卡片畀班新議員，介紹自己之餘，亦畀自己個電話號碼大家，等班議員第時有事可以打畀佢喎。咁積極做好自己份工，難怪當日傾政治架構改組時，有傳佢係文化局副局長啦！
至於Ronald落立法會嘅目的亦大同小異，第一時間周圍派卡片外，亦特別想同班新議員混熟啲。Ronald所屬嘅政策局主理大量敏感同受爭議議題，唔通咁快就有嘢要同班議員摸底？佢笑言，政治每樣嘢都好迫切，叫大家唔好諗咁多喎；咁識得講嘢，抵佢有運行啦。