政情：馬場稀客CY 請廠商會高層食飯
跑馬地馬場尋日出現咗個稀客，就係特首梁振英（CY）嘞。佢尋晚喺特首辦主任邱騰華嘅陪同下到馬場，CY原來係去同中華廠商會嘅領導層食飯，順便睇埋廠商會隻馬出賽。
話說CY尋晚七點幾同邱騰華一齊喺跑馬地馬場出現，同場仲有勞工及福利局局長張建宗、發展局局長陳茂波同中央政策組首席顧問邵善波。原來CY係嚟宴請廠商會嘅領導層，而且撞正廠商會隻馬「創出商機」出賽，當然會方唔少人都一定到場啦。除咗會長施榮懷之外，仲有多位「深唐」人士，包括全國政協常委陳永棋同立法會議員林大輝都在場，一共兩圍枱。咁融洽，真係全部都係香港營喎。CY當選之後，應該都係第一次喺馬場請咁多人食飯。
施榮懷會長話，大家喺席間向CY反映咗港商喺內地發展嘅機遇，例如可否開拓另一個珠三角、稅務安排又可以點。其實邊度係食飯？咪又係開會！