政情：何俊仁申報 甩漏兼錯字
民主黨何俊仁多次被踢爆向立法會漏報利益，佢尋日交番畀立法會嘅個人利益登記冊亦諸多甩漏，幾乎又漏報佢擁有嘅物業。喺持有土地及物業一欄，佢明明已經答咗話「有」，但填寫有關資料時就寫「沒有」，之後先至畫去再改，填番佢有份嘅兩個物業，分別係「在九龍與他人共同持有」和「在港島透過Fountain Success持有50%業權」。
喺選舉捐贈一欄，何俊仁申報有收到捐贈，不過就「有侍（待）核實數子（字），稍後補充」，十個字錯咗兩個，唔通有讀寫障礙？不過鐵頭仁依然冇報自己係持有白鴿黨總部物業嘅公司SOUND FACTOR嘅股東。
之前同樣畀人揭發涉嫌漏報利益嘅公民黨湯家驊尋日亦都交咗議員個人利益登記冊，而佢早前涉嫌漏報嘅公司亦都已一一申報番，睇嚟鐵頭仁真係要檢討吓喎。