政情：議員宣誓鬥顯顏色
新一屆立法會尋日舉行第一次會議，七十位議員排隊輪流宣誓，同埋互選立法會主席。宣誓儀式莊嚴而且重要，唔完成程序唔可以正式上任，所以尋日唔少議員都隆重其事，好似立法會第一大黨民建聯咁，大部分男議員都夾埋戴上藍色呔，睇落算係幾整齊；新民黨兩位議員嘅衫亦襯到絕，灰色配紫色，睇落好醒目。其他議員第一次開會亦有唔少趣事，其中公民黨陳家洛更加收到媽媽畀嘅「開工利是」，預祝佢未來四年一切順利，而民主黨胡志偉就踩單車去開會，話要落實環保嘅承諾喎。
先講民建聯，所有男士戴藍色呔影大合照，但曾鈺成競選主席時戴嘅係米黃色呔，唔知係咪要刻意保持獨立。女成員方面，蔣麗芸宣誓時着咗件黑色外套，但去食晏時竟然換咗件粉橙色短褸，佢解釋，本身早就預咗着粉橙色，但後來怕會喺宣誓前要為十．一海難默哀，所以都係着番件黑色穩陣啲。
葉劉田北辰着灰襯紫
新民黨方面，主席葉劉淑儀同副主席田北辰亦雙雙穿上灰色配紫色嘅西裝同套裝，佢兩位仲特登帶埋家人嚟睇宣誓添。講開着衫，點可以唔講謝偉俊（Paul）。阿Paul着咗一件類似歐洲中世紀軍褸嘅外套，再加上一個疑似歐洲皇室徽章嘅心口針，成身襯到絕一絕，唔做議員去做模特兒都得。
胡志偉踩單車返立會
除咗着衫，其他議員第一日開會都有趣事，好似陳家洛咁，佢同媽媽一齊住，陳老太一早就畀咗封開工利是佢，祝佢順順利利。陳家洛話，媽媽由細到大都好錫佢，雖然依家咁大個人，仲有五個小朋友，但媽媽每逢重要日子都會封利是畀佢喎。至於胡志偉尋日第一日開工，就選擇踩單車去開會，佢話以後都會繼續咁做喎。
此外，民主黨黃碧雲宣誓期間不斷玩自拍，仲即時上載社交網站，似乎都幾跟得上潮流；至於金融服務界張華峰，尋日宣誓前喺正示威區落車，班示威者都視若無睹，擺明就係唔識佢，睇嚟都係要諗諗點提升知名度先得。