中環出更：樓王貼士買舖回報高
美國無限期狂印銀紙，同美元掛鈎嘅港元，勢將進一步貶值。有樓王之稱的廖創興家族後人廖偉麟（Jeffrey）就話，低息期維持至二○一五年，熱錢流入，將推高寫字樓及商舖租金，投資買舖、買寫字樓，仍然會有高嘅回報。
啱啱沽售上環寫字樓單位，袋六千五百萬元嘅Jeffrey，近年戰績彪炳。早前佢出席各大青年團體嘅聚餐午宴，不忘為p:後市把脈。
Jeffrey分析道，只要息口持續維持低水位，樓市好難大跌，縱有調整，亦只在百分之五至十以內，佢會繼續(目及)實甲級寫字樓，有筍單位一定揸。Jeffrey亦預測商舖情況繼續向好，港島及九龍區靚舖，貴貴都買得過喎。
吳傑莊睇好黃金
同場嘅金至尊數碼行政總裁吳傑莊（Johnny）就話買金最實際。幾年前當金價每安士只係九百幾元時已開始密密吸。近日繼續睇好，相信揸到年尾，會有百分之十回報。Johnny亦(目及)實有創新能力嘅科技股票，好似喺美國上市嘅「蘋果」股票，四年前每股只係兩百多美元時已吸納，如今升到每股七百美元，和味到極，難怪佢一口氣掃十部iPhone 5，絕不手軟嘞。
向來係經濟寒暑表嘅的士牌價，近年爆升，直逼七百萬元「癲價」，家族擁有唔少的士牌嘅潮商青委主任葉振南（Stephen）都話難以置信。牌價現價約六百三十多萬元，已係歷史新高，佢有信心牌價仍會升，但貿然入市風險甚大，寧願將錢「泊」喺美債，收取近四厘利息，無謂接火棒喎。
卓妮