南丫島驚天海難之後，有網民問咗條咁嘅問題：「點解沉船都會死咁多人？佢哋唔識游水咩？」跟住發生乜嘢，相信大家都估到啦，就係抨擊留言群情洶湧，呢位網民迅速被批評聲浪沒頂。
海難港殤，全城同悲，市民反應強烈係正常嘅。之不過咁，換個角度諗，呢位網民嘅問題其實都唔係完全錯得晒o架，船隻航行涉及乘客安全，理應各方面都有嚴格監管，做到萬無一失，點解一次撞船意外就造成死傷枕藉？點解沉船之後咁多乘客因為求生無援而白白浸死？呢個問題點止個別網民唔明白，所有人都好想問一問當局呀！
嗱，對於沉船事故造成嚴重傷亡，「東方報業民意調查」顯示，四成二受訪者認為要重新檢討船隻規格；兩成八批評海事安全無王管；一成九指應加強安全設備。至於事發時船上小童未跟足海事處指引穿着救生衣，兩成九受訪者狠批指引形同虛設；兩成八斥船員應變及指引不足，須加強訓練。
民心如鏡，睇嚟船隻安全欠缺監管呢隻鑊，當局打風都打唔甩o架嘞，快快諗計堵塞漏洞啦。學者同區議員係咁講嘅，海難慘劇凸顯海事安全無王管，無論喺航行安全管理、觀光船規格、事故應變指引等等，都有不足之處。舉例講，家陣節日船河大行其道，當局執法有冇與時並進，喺節日期間加強巡查呀？又有冇加強監管船隻數目，避免海窄船多釀成意外呀？當局執法防線穿咗咁多大古窿，監管船隻安全呢隻舢舨仔不堪一擊，唔出事就奇啦。
所以咯喎，上述民調亦顯示，四成四受訪者指當局應該重新檢視整體航道；兩成六憂慮現時海上交通擠擁，易生意外；一成八擔心海上交通不安全。
唉，以前話馬路如虎口，家陣連搭船都危機四伏，都咪話唔攞命。各位港產官僚，人命關天呀，監管工作可唔可以認真啲呀？法例規管可唔可以完善啲呀？次次都係咁，等到搞出大事，先至嚟後知後覺。美容針害到市民雞毛鴨血，先至驚覺對美容業監管不足，失修危樓搞出人命慘劇，先至發現對舊樓安全監管唔夠，等到海難事故造成死傷枕藉，先至知道對船隻安全監管甩漏。
小心駛得萬年船，民調中大部分受訪者認為應加強監管煙花觀光船，其中五成三指應設立申請制度，限制船隻數量；兩成四指要實施更周詳及嚴格要求；一成七指要加強執法，維持秩序。
咁講啦，若然執法防線穿晒窿，船隻安全一定安全極都有限，港產官僚身為交通事務掌舵人，唔該打醒十二分精神，踩行油全速堵塞安全漏洞！大吉利是講句，驚天海難一次都嫌多，市民唔想畀懶散官僚搭沉船呀！