政情：海難頭七 貪曾酒店慶牛一
「十‧一海難」全城哀傷，適逢尋日係海難「頭七」，點知「貪曾」曾蔭權喺呢個時候非但冇同港人同悲，仲有心情同家人出街食飯慶祝生日，期間有人疑似贈興，突問貪曾「你有冇事」，貪曾故作輕鬆話「冇事、冇事」，究竟呢句係咪貪曾嘅真心話，相信只有佢自己至知嘞。
貪曾卸任後銷聲匿迹，立法會選舉投票後無耐，佢又活躍番，好似尋日喺「十‧一海難」嘅「頭七」，貪曾竟然不知避嫌，六點半左右仍同太太、兩個仔、新抱同孫女到港島香格里拉酒店夏宮食飯慶祝佢六十八歲生日。由於佢依家係一介平民，一行人無坐喺廳房，反而坐喺大廳，仲巧遇前教育局政治助理楊哲安等一家人坐喺鄰座用膳添，當貪曾同家人切生日蛋糕，楊仲充當攝影師，幫貪曾一家人合照。
被市民問「你有冇事」
貪曾喺晚膳期間一直愁眉不展，之後有一位長者同貪曾講生日快樂，但隨即突問貪曾「你有冇事」，貪曾故作輕鬆話「冇事、冇事」，此時曾鮑笑薇同貪曾細仔慶淳發現記者行蹤即時「黑面」，後者仲用手機反拍記者。餐飯八點半食完，曾太發爛渣話「好心你哋唔好再跟喇！」