政情：田二少自己地頭蕩失路
新界西立法會議員田北辰喺九月立法會選舉順利勝出，點知佢前日去屯門一間酒店參加所屬政黨新民黨嘅集思會時，竟然發生蝦碌事，揸揸吓車竟然去咗大嶼山，搞到身為黨副主席嘅佢，出席集思會遲晒大到，到場時一臉尷尬，當晚仲被迫要請全世界食消夜添。
新民黨前日拉隊去屯門舉行集思會，出席人數有成三十幾人，陣容都幾鼎盛。呢間酒店坐落屯門中產區，喺區內算係數一數二，原本以為一向極力爭取中產選民支持嘅二少對呢區應該熟到爛啦，點知平日有司機接送嘅佢，一自己揸車就蕩失路，認真搞笑。
身為黨副主席，遲到梗係要受罰，據講二少到場時尷尷尬尬咁，不斷向準時到場嘅黨友致歉，最終為表誠意，當晚仲請大家食消夜賠罪，終於得到眾兄弟姊妹嘅原諒。講番今次集思會，佢哋今次傾咗都多嘢，由點樣招收多啲黨員，到加強宣傳同政策研究都有討論，總知躊躇滿志啦。