政情：經民聯小心經脈亂
新一屆立法會開鑼在即，各大陣營嘅整合戰終有新進展。經濟動力林健鋒（Jeffrey）三人成功拉攏四名獨立議員結盟成立香港經濟民生聯盟，簡稱經民聯，旋即成為建制派第二大政團，Jeffrey獲委任為行政會議成員嘅呼聲更高，不過細看經民聯嘅組成好有趣，儼如集百家之大成，既有濃厚唐營色彩，又同建制派第一大黨民建聯一樣以「是其是，非其非」對待政策議題，難怪有人為經民聯改花名為「經脈亂」喇、甚至「經紊亂」喇！
由經濟動力同自由黨等十二人組成嘅工商專業聯盟，喺上屆立法會好似「貼錯門神」，令到工專聯組織鬆散且發揮作用有限，Jeffrey等人吸取教訓後最近重組聯盟，首先易名為香港經濟民生聯盟，由經濟動力三子、專業會議梁美芬同石禮謙、金融服務界張華峰同工程界盧偉國七人組成，最令人嘖嘖稱奇係七人當中有五人喺經民聯有職位，主席係工業界梁君彥，副主席分別係Jeffrey同張華峰，秘書長係石禮謙，另劉皇發出任名譽主席，呢個組織架構認真大陣仗。
握七票 林健鋒勢入行會
倘再細看經民聯嘅組成，更好似係集百家之大成。首先七人當中有五人，包括Jeffrey、梁君彥等都曾提名唐英年，最令人意想不到嘅係，經民聯尋日成立時仲有多名前唐英年競選辦公關現身幫手，儼然由唐營做骨幹；其次經民聯嘅縮寫雖然同民建聯次序不同，但兩個縮寫只一字之差，加上經民聯用埋民建聯成日掛喺口邊嘅「是其是，非其非」話語，頓時令人有無限聯想。
經民聯喺政圈橫空誕生，手握七票嘅Jeffrey有望更上一層樓做行會成員。Jeffrey重申，自己唔會用七票搵任何職位。梁君彥則指特首選舉後不分唐營、梁營，強調香港只有一個合法政府，第時經民聯每件事都會拎出嚟傾，不過唔會綑綁投票。究竟經民聯會否變成「經脈亂」、「經紊亂」，講就原則多多但做就事事支持政府，大家要拭目以待喇！