中環出更：名人齊扮嘢 預演《茶花女》
經典歌劇《茶花女》快將喺香港上演，作為香港歌劇院首席贊助商嘅太子珠寶鐘錶，上周五夜晚喺海港城海洋中心四樓Spasso意大利餐廳露台，率先舉行一場化裝晚會，模仿百幾年前《茶花女》喺威尼斯首演時嘅場景。太子珠寶主席鄧鉅明（Jimmy）、執董朱鄧麗萍及一眾城中名流嘉賓，個個花盡心思扮演劇中人物，維肖維妙。大會仲頒發「全場最佳衣着」大獎，結果由潮人甘國亮以一襲最新時款馬褲裝束奪冠。
是夜唔止衣香鬢影咁簡單，事關靚女們爭相作復古打扮，俊男們就戴上羽毛眼罩，現場華麗又神秘。Jimmy及姐夫朱繼陶唔得閒裝身扮嘢，一入場就急不及待揀選至靚嘅眼罩戴上，玩味十足，嘉賓都爭住同佢哋影相。艾美錶代理商大昌華嘉香港高層潘正棋（Francis）都喺度，金莎朱古力亦係佢旗下產品，鍾意食甜品嘅Jimmy即刻為自己「請命」，向Francis建議應該生產低糖嘅朱古力，為關注血糖及健康嘅朱古力迷解饞，認真為食。
劉黃寧達自己設計耳環
城中名媛珠寶設計師劉黃寧達（Leta）都嚟撐場，佢係愛沙尼亞共和國駐港名譽領事林建康太太林黃寧艷嘅家姐，兩姊妹經常孖住出席派對，不過當晚妹妹沒現身，佢就同難得現身嘅律師老公劉守良拍拖來到。卓妮見佢戴住一對由黃綠翡翠及白鑽鑲製而成嘅吊墜耳環，設計雅致，不落俗套，原來係Leta自己設計。Leta來自新加坡，原本係專業投資分析師，但深愛糅合時代感嘅翡翠首飾，所以讀鑽石鑑定及翡翠文憑後，最近轉做珠寶設計師，現設計一套翡翠系列，好快面世為城中姊妹扮靚喇！
卓妮