「楚王好細腰，宮中多餓死」，講嘅係春秋戰國時楚靈王對細腰女子情有獨鍾，宮中妃嬪為求獲得君王青睞，紛紛節食減腰，結果餓死唔少人。呢個故事唔只係黑色笑話，而且成為千古奇談。
呢啲咪就係要靚唔要命囉，古代人係咁，現代人亦係咁。四名婦女喺一間醫學美容集團接受靜脈輸液後出現敗血症，其中三人仍然危殆。該集團負責人聲稱顧客簽過免責聲明，清楚療程只係保健行為，唔係醫療行為；佢仲強調相關療程未經醫學證實可治病添。
咁就奇喇，既然療程未經醫學證明有效，點解會要求消費者接受相關療程呢？邊個要為事件負責呢？嗱，食物及衞生局局長高永文係咁講嘅，若涉及抽取一個人嘅血液，經處理後再透過靜脈注射方式注回該人體內，毫無疑問係醫學程序，必須由註冊醫生監督或親自進行，否則就可能涉及無牌行醫。
即係咁，今次事件係咪涉及無牌行醫，邊個需要負責，仲有待當局進一步調查，但有一點好清楚，就係當局對呢啲所謂醫學美容嘅監管嚴重不足，法例出現明顯漏洞。眾所周知，近年醫學美容中心開到成行成市，手法千奇百怪，療程五花八門，究竟屬於醫療或者美容，莫講話普通消費者一無所知，連專業人士都未必分得清。美容公司捉住人人愛美嘅心理，將千奇百怪嘅美容療程吹到天花龍鳳，幾乎八十歲都可以變十八歲，東施都可以變西施，吸引愈來愈多消費者落疊，而當局又闊佬懶理，唔監唔管，唔出事至奇喇。
呢，立法會議員梁家騮指出，醫學界十幾年前已要求政府立法，規管從事醫療業務嘅公司，以及推廣失實或無醫學實證嘅治療或美容方法；而佢三年前更已草擬私人條例草案，規定從事醫療業務嘅公司，過半數董事須為註冊醫生，點知煲呔曾政府竟以該草案阻礙基層醫療發展為由予以拒絕。
所以話，貪曾政府真係害人害物， 一味吹水唔抹嘴，話要發展醫療產業，但對於開到成行成市、事故頻頻、投訴多多嘅醫學美容就放任自流，連立法規管咁基本嘅程序都唔肯做，簡直懶到出汁，草菅人命。講到尾，今次事故貪曾都有責任o架！
正所謂不可一不可再，美容事故一單都嫌多，依家係亡羊補牢嘅時候嘞。既然高永文都識得話今次事態嚴重，令人震驚，咁就要盡快堵塞漏洞，加強監管，唔好再拖拖拉拉，如果唔係，更加嚴重更加震驚嘅事故可能陸續有來。當然，愛靚嘅女士們亦要提高警惕，千祈唔好攞自己條命較飛呀！