新一屆立法會下周三召開首次會議，根據《議事規則》，議員要喺開會前向秘書處遞交「議員個人利益登記冊」，申報擔任公私營機構董事職位、名下物業等所有利益。喺交咗申報表嘅十四位議員當中，民主黨（白鴿黨）胡志偉喺土地及物業一欄填上「在中國內地擁有物業」。貴為立法會議員，擁有物業一啲都唔出奇，奇就奇在胡志偉身為白鴿黨中常委，竟然夠膽喺內地買物業，唔通佢唔擔心冇回鄉證返唔到大陸，搞到間屋一直丟空冇人理？
胡志偉解釋，物業係喺二○○○年去中山旅遊時用廿零萬購入，雖然內地唔少物業同香港一樣得嗰幾百呎，但實用面積就明顯比香港高得多，小朋友可以有大啲嘅活動空間，所以佢全家每年都會上去度假兩至三次。
胡志偉又爆響口話，○一年做白鴿黨中常委時已經試過被沒收回鄉證，所以幾年都冇返去睇過間屋。至於驚唔驚該黨換屆後會再有機會被沒收回鄉證，佢就用「冇得驚」三個字嚟回應，又拍心口話自己經驗豐富喎。