政情：老師瞌眼瞓 葉建源無癮
立法會教育界議席今年換上新人葉建源，佢話自己同上屆議員張文光最大嘅分別，就係佢教學經驗豐富，除咗教過中小學外，幾年前仲試過喺浸會大學同教育學院任教進修課程，對象係一眾中小學教師。
葉建源話，由於老師經常加班開會，準時上堂聽書嘅老師根本唔多，就算趕得切上堂，都有唔少人因為太攰而瞌眼瞓。雖然知道學生並唔係因佢講書悶而瞓着覺，但就因此而教到無晒心機，所以教咗一年就冇再教落去喇。
作為議會新丁，葉建源打頭炮嘅係提出首個有關國民教育嘅動議，佢話除國民教育外，任內都會關心中學縮班殺校嘅問題，遲啲仲會拜會教育局局長吳克儉。
佢話，其實殺校未必係壞事，因為政府可以順便改善教育界一直以來面對嘅困局，包括老師授課節數太多太長、冇時間照顧能力平庸嘅學生等，從而提升整體教學質素。不過，佢話做議員後嘅工作更繁忙，根本連休息都冇時間，上星期中秋長假都淨係同屋企人去咗兩日澳門當放假喎。