新一屆立法會七十名議員有近一半係議會新丁，由於資深議員助理有議會「盲公竹」嘅功能，一眾資深助理即時變得奇貨可居。據聞呢場議助爭奪戰差不多去到尾聲，民建聯（民記）多名新丁都成功搵到資深助理加盟，其中由梁美芬過檔幫民記港島議員鍾樹根嘅一名助理，日前就向傳媒好友廣發電郵話自己搵到新歸宿，認真別具一格。
請到好助理，相信會係成功嘅一半，二十八名議會新丁都早前爭相聘請資深助理幫手，據聞大部分有經驗嘅議助已經有歸宿，好似曾幫過專業會議劉秀成十二年嘅女助理，已經蟬過別枝協助民記新界東議員葛珮帆。至於民記新界西議員陳恒鑌，亦有意聘請鄉議局副主席張學明嘅前議員助理幫手，但有待最後商議。
講番成功由區議會「升級」做立法會議員嘅鍾樹根，原來除咗請咗梁美芬個前助理外，仲搵埋黨友黃容根嘅前助理過檔幫手，認真揼本，但係咪物超所值就要等時間證明喇。