政情：徐立之冇晒計仔要快閃？
在任香港大學校長十年、曾獲「香港最佳大學校長」美譽嘅徐立之，日前出席一個活動時話，自己任期最遲去到一四年二月底，假如一三年九月港大物色到合適嘅校長人選，佢就會趁喺最光輝嘅一刻離開，留住美好時刻咁話。佢笑稱，自己計仔快將用盡，仲唔早走早着咩！對於之前有唔少學生都話唔捨得佢走，佢就話，港大咁大間機構，佢總會有離開嘅一日，呢個係新陳代謝嘅自然定律。
徐立之喺去年「八一八」港大百周年慶典風波之後，對外宣布將於同年年底離任，但因為校方一直未物色到理想接班人，令徐立之延長任期至今。佢話做港大校長之前，本來都冇打算過嚟香港打工，依家喺香江逗留咗咁耐，實屬意料之外。
至於退咗休之後會否繼續留港，佢就話未有計劃。問佢之後會否擔任其他工作或公職？佢話心中有個數，如果退休後六個月內都冇人邀請佢做嘢，咁就唔使再諗咁多，專心享受人生喎。