政情：環境局搞「夢幻組合」
現屆政府強調環境政策係未來施政重點之一，除咗搵到做環保出身嘅黃錦星（KS）做局長外，前排再公布由陸恭蕙（Christine）出任環境局副局長專責空氣政策，一洗過往「外行人管內行人」嘅形象。近日再傳出環境局政治助理一職亦已覓得合適人選，佢就係被公認為靚女嘅地球之友副環境事務經理區詠芷（Michelle），倘若屬實，佢同KS、Christine將組成「夢幻組合」，意味政府同環保團體「雞同鴨講」嘅年代將會終結。
其實自從Michelle喺五、六月應徵做政助一職後，官場好快就有消息傳出，今次風聲再次吹起，雖然當事人話仲未收到消息，但空穴來風，未必無因。KS上任後多次強調，固體廢物、源頭減廢等政策將會係局方未來嘅工作重點，而當局現時針對廚餘回收，連同減廢咁啱正正就係Michelle喺地球之友嘅專責範疇。其實Michelle之前呼籲市民叫少兩碟餸以減少廚餘嘅行動，特首梁振英私訪新界西期間同地區人士食飯，都有響應叫少兩碟餸。
不時與KS分享政策意見
至於KS同Christine，大家都係環保圈子嘅人，Michelle就話，雖然大家冇咩特別合作過，但大家都不時分享有關環保政策嘅意見，而KS埋位後，Michelle亦經常接觸佢，表達一吓關於廢物處理同能源效益嘅議題。Michelle又話，其實環保議題相當單純，直情純過蒸餾水，以環團嘅角度去睇，如果問責團隊可以同環保組織一班有心有力嘅人組成團隊推動環保，當然係最理想啦！
其實上屆政府嘅環境局都係有齊局長、副局長同政助，相當有台型，但具體做咗啲乜，相信大家有眼睇。今次「夢幻組合」有望誕生，鐵三角或將再現，既有台型，亦有相當環保工作經驗打底，仲理想爆燈，唔知環團又點睇呢？不過世事往往知易行難，而「夢幻組合」嘅行政經驗亦始終有限，究竟能否創造奇迹達成理想，定係只會閉門「夢遊」收場？咁就要拭目以待喇。