亡命U轉屈機慳泊費
已列入租者置其屋計劃的屋邨泊車閘機驚現漏洞，竟任人「屈機」避過繳費！有車主發現早前有貨車在粉嶺祥華邨落貨區逾時停泊後，竟「偷雞」駛入邨內停車場後再以極速出閘，成功免付泊車費，擔心濫泊成風之餘，更隨時因飛車而橫生意外。區議員與關注團體皆促領匯徹查事件，盡快堵塞漏洞。
楊先生（化名）為祥華邨停車場月租租戶，近日聞悉邨內不時有人利用停車場收費漏洞逃避繳費，倘在落貨區停泊逾半小時、超出免費優惠時限者，只要直接進入時鐘停車場再極速出閘，便可分文不繳，「唔理你喺落貨區泊幾耐，只要兜入時租停車場拍一拍卡，然後踩行油，喺十幾秒內極速兜一圈就出番去，咁樣就一蚊都唔使畀！」
由於擬泊「霸王車」者須以極速於時租停車場內行駛，楊先生擔心會因此釀成意外，「已經同停車場投訴過，但係佢哋話冇證據，之後就不了了之！」楊坦言曾目睹有車輛進入停車場閘口後，隨即快速地一百八十度掉頭出閘，對其他車輛及場內行人均構成危險。
落貨過鐘 唔使畀錢
事實上，有街坊亦直言曾貪此「着數」，由於當日在落貨區停車超過三十分鐘，須被收取十五元時租，「求其入停車場兜一兜，停車場淨係收我十一蚊一個鐘，咁就慳咗四蚊！」
記者實地視察時，發現落貨區與停車場之間的車路並無間隔，車輛可自由地在上落貨區駛入停車場，變相讓人有機可乘。
祥華邨管業處發言人表示，由於車路的入閘系統與領匯停車場系統屬不同公司管理，該處已要求提供車路系統的供應商「八達通公司」盡快提供改善方案。
領匯發言人則說，所有進入屋邨範圍及停車場的車輛均需通過祥華邨車路閘機，該閘機由法團委任之管理公司負責管理及營運，領匯正跟該管理公司積極商議解決方案，務求盡快解決問題。
各自為政 危害街坊
「都聽過話有『蠱惑招』可以唔使畀停車場錢，估唔到係真嘅！」北區區議會主席蘇西智直指事涉屋邨管業處與領匯溝通不足，令停車場管理出現漏洞，不但令違規者有機可乘，更或危害街坊安全，要求從速糾正。
公屋聯會主席王坤則認為，事件反映領匯與管業處各自為政，要求雙方商討妥善解決問題的同時，日後亦必需建立有效的溝通機制，以提升管理質素，「管業處損失落貨區嘅停車錢，領匯又收少咗停車場錢，巿民安全又受威脅，直情係三輸！」
記者：朱廣華