有人話，的士係一座城市嘅形象。咁香港嘅形象究竟係點嘅呢？
嗱，本來都唔錯o架，算得上五官端正，乾淨企理，喺好多旅客心中留下唔錯印象。但可惜，最近情況有變，形象扭曲，唔止冇變靚咗，反而變醜咗，搞到賊眉賊眼，生人勿近，幾趕客呀！
嗱嗱嗱，賊眉賊眼唔係比喻，真係有賊的士通街走o架，而且仲係聯群結黨添！繼日前有機場的士濫收車資兼明搶乘客行李之後，尋日尖沙咀又有不法司機以同類手法犯案。一男兩女內地旅客搭的士前往中港城碼頭，點知畀完錢落車準備攞行李時，的士司機突然踩油絕塵而去，事主制止不及，無奈報警，各人合共損失約六萬元財物，呢程的士都算貴囉。
的士喺香港無處不在，原來賊的士一樣係通街走，連同呢單案件，本年已發生至少十四宗同類罪案，主要以濫收車資同搶走行李兩招劏客，又或者假意殷勤幫客人搬行李，伺機偷取貴重財物。
唉，好事不出門，醜事傳千里，的士排隊上客就話抵讚啫，家陣排隊劫客咯喎，消息傳咗出去，你估香港仲有乜形象可言吖？的士係旅客嘅主要交通工具，如果以後搭的士要提心吊膽，你估旅客仲會唔會嚟香港旅遊吖？無論點都好，為咗香港嘅形象同旅遊業，當局一定唔可以偷懶，快快全力打擊賊的士！
講到呢度，功夫茶有個問題諗唔通。開講有話，的士係經濟寒暑表，家陣香港嘅環境未至於差到要鋌而走險啫，點解接二連三出現的士搶錢嘅不法事件？點解無良司機紛紛變身發窮惡嘅不法之徒？唔通真係唔怕警察拉？
冇錯，賊的士愈來愈猖獗嘅原因，就係唔怕拉！大家睇呢單案就知嘞，警方早前放蛇，原本八十蚊車資，司機收咗五百蚊後唔找錢就開車絕塵而去，擺明撳住嚟搶。好嘞，疑犯斷到正，梗係走唔甩，落網後承認濫收車資、偷竊等三項罪名，點知最後只係被判一百小時社會服務令、停牌六個月同罰款兩百蚊。刑罰輕成咁，毫無阻嚇力，咁同鼓勵犯案有乜分別呀？無良司機撳住搶，就算斷正都好易過骨，唔膽生毛就有鬼咯。
咁講啦，賊的士黨猖獗，唔止係行業問題，更加會嚴重影響旅遊業及成個香港形象，當局絕對唔可以姑息縱容，除咗加強放蛇掃蕩，仲要研究加強罰則阻嚇。記住，對壞人仁慈等如對好人殘忍，如果唔想旅遊業冚旗，唔想香港形象掃地，就要犂庭掃穴，令賊的士冚旗！