一場選舉結束之後，好多政黨都有新發展，我哋之前獨家報道過，仁濟醫院主席鄭承隆會加入新民黨，據講疑似擔當一條「大水喉」角色，射住新民黨發展。事件到近日終於有新發展，新民黨前日舉行中央委員會，終於通過由鄭承隆擔任該黨第二副主席，負責新界西事務。鄭承隆尋日出席一個公開活動時，就話以後會花多啲時間喺地區做事，但從政與否就言之尚早。
仁濟醫院主席任期剩番半年，鄭承隆話之後應該唔會加入其他機構，所以會花多啲時間喺地區，而且由今次立法會選舉所見，地區樁腳顯得非常重要，所以以後會集中處理新界西工作。至於無端端多咗個副主席，升咗呢做立法會議員兼新民黨常務副主席田北辰就話，因為新界西對該黨來說仲係個新區，需要開發人才同網絡，而鄭承隆係仁濟醫院高層，喺新界西人面一定廣，搵佢一齊處理新界西事務係最適合不過嘅人選。