政情：沈祖堯感嘆時下人嘴刁
中大校長沈祖堯一向身體力行，盡一切方法培養學生嘅公民意識，佢尋日喺主場中文大學出席活動時提到，佢好重視學校內嘅廚餘問題，就連自己都甚少去飯堂食飯，一般都係請同事買飯盒就一餐，每次盒飯都好大，好多時食唔晒覺得好浪費。
沈校長建議，學校飯堂可以考慮提供細分量嘅選擇，相信可以大大減低顧客食剩嘢嘅機會。現場有學生問到，有乜行政措施減少校內難食嘅食物，沈校長就笑言，廚師風格各有不同，歸根究柢係依家嘅人「嘴刁」咗，佢後生嘅年代物資匱乏，冇乜嘢唔食得落口喎。
不過，講到食少啲嘢，沈校長其實都遇過蝦碌事，佢透露有次應邀去試食，一日食成七餐咁多，事前已經有人提醒佢，早餐千萬咪食咁多，否則全日食咁多點掂呀？點知當日，全部試食嘅都係素食，為免浪費，佢每樣都係食一啖就算，點知夜晚返到屋企仍然肚餓，結果搞到要食消夜醫肚。