立法會每逢周三大會上，各議員可就社會時事提出兩項無法律效力嘅動議辯論，但喺議員僧多粥少嘅情況下，議員就要靠抽籤爭取動議機會，而新一屆立法會首兩項動議就由教育界葉建源同工黨幸運抽中。
雖然工聯會同部分泛民主派政黨一早表明想搶先動議講標準工時，但今次幸運之神明顯眷顧泛民，由工黨何秀蘭抽中籤，佢仲爽快讓咗個機會畀社福界張國柱講標準工時政策，結果搶先工聯會一步，只怪工聯會唔夠運囉。
至於成功抽中另一條動議辯論嘅係無黨派嘅教育界新丁議員葉建源，佢話難得第一次就抽中籤，梗係要講佢最關心嘅國民教育啦，但佢話要盡快了解議事程序，費事到時出洋相喎。據聞佢將會要求當局正式撤回德育及國民教育科同課程指引，仲會要求處理事件。