政情：工專聯謀孤立自由黨

新一屆立法會即將開鑼，各大陣營嘅整合戰快將完成，其中經濟動力就同新早餐派眉來眼去。消息指，新早餐派以星爺同體育、演藝、文化及出版界馬逢國為首，加上幾名建制派獨立議員，至今最少坐低傾咗多次，合作形式不拘。但基於部分人講明唔會加入任何組織，所以據聞未必會有正式嘅稱號，反而最驚人嘅進展，係會按需要參與類似工專聯呢個平台同經濟動力等人合作。

有需要時可合作

知情人士強調，經濟動力同新早餐派冇話邊個歸併邊個嘅問題，總之有需要就合作，冇需要就各自修行，主因大家係無黨派嘅工商專業人士，明眼人一睇就知有意同本身屬政黨嘅自由黨保持距離︰「好似話依家盛傳林健鋒入去做行政會議，如果係第時唔違反行會保密制下，可以喺某啲階段做啲工夫，例如摸吓底知道大家嘅取態，而且有相當互補作用。」

事實上，經濟動力同新早餐派按需要加強協作一早有迹可尋，某程度上更加係形勢使然。消息指，建制派早前就財務委員會主席協調候選人時，一直以多年前做過財委會副主席嘅星爺呼聲最高，但卻有人力撐喺建制派內部人緣麻麻嘅飲食界張宇人出戰，加上流傳有人會拉隊集體叛變支持民主黨劉慧卿，建制派內部惟有退而求其次，支持兩人輪流做主席。經此一役後，大家對有關工商政黨嘅信心跌至低點，冇互信又點會有合作空間呢？所以自由黨被孤立只係時間問題。