中環出更：唐媽媽爆料 英年重掌祖業
前政務司司長唐英年競逐特首落選後，外界高度關注佢嘅動向，市傳唐唐受父親唐翔千之命，將重返家族企業半島針織廠。卓妮尋日喺仁濟醫院嘅活動上見到唐媽媽唐尤淑圻，梗係要追問真相啦，唐媽媽就爆料話，阿仔要返公司做嘢都唔係話返就返，事關要跟政府規定過一年再就業冷河期，但好彩話咁快喺九月廿八日已屆滿一年，意味唐唐隨時重掌祖業。
幾時都精力充沛嘅唐媽媽，尋日現身仁濟醫院與交通銀行首次發行聯名信用卡活動。卓妮同佢傾閒偈，佢都冇再好似選戰期間咁避忌，表現大方。唐唐從政超過廿年，家族企業嘅董事總經理幾經替換，都係畀外姓人做，但唐媽媽話自己一路都有睇住盤生意o架！咁唐唐返公司之後，唐媽媽咪可以真正退休囉？
不過，如果日後唐唐心癢想再重返政壇，唐媽媽又會唔會支持阿仔呢？唐媽媽就若有所思話：「年紀大囉喎！」唔知唐媽媽係講緊唐唐年紀大唔適合再從政吖？定係擔心自己年紀咁大都仲要再出山呢？