中環出更：港大頒名譽院士 多位名人獲殊榮
香港大學尋日舉行名譽大學院士頒授典禮，獲頒授嘅院士包括樂施會前總幹事莊陳有、歷史博物館榮譽顧問丁新豹（豹哥）、SML集團主席孫少文（Simon）、著名作家陳冠中等。尋日港府為「南丫IV」海難中死者默哀，當中有兩位死難者係港大研究院學生，校長徐立之喺典禮上特意安排默哀一分鐘，以悼念兩位校友。
莊陳有帶埋太太及愛女莊靖（Jane）分享得獎喜悅，雖然心中高興，但佢仍不忘掛念於海難中喪失家人好友嘅市民。佢話，每個人都有失去，佢自己都失去咗視力，但並冇因此放棄自己，所以希望佢哋將痛苦化為鼓勵，積極面對將來。Jane現正喺港大修讀英文系，明年就畢業，佢話受到爸爸樂於助人嘅性格影響，曾經到雲南、柬埔寨、非洲等地做義工，擴闊國際視野，學習將自己擁有嘅物質同別人分享。
「豹哥樂園」到場賀丁新豹
另一獲頒院士嘅豹哥就被粉絲重重圍住，原來粉絲們組織咗「豹哥樂園」呢個會員俱樂部，同豹哥研究歷史心得。一眾粉絲中，卓妮竟然見到港大專業進修學院董事局主席張永霖，原來佢同豹哥「不病不相識」，話說六十年代，佢哋不約而同因病入咗養和醫院留醫，仲瞓埋喺同一間病房，緣分有時就係咁奇妙。
讀得歷史，記性一定要好，問豹哥有乜記憶妙方？佢笑謂，對一樣嘢有興趣，自然會記得o架啦！佢現正致力研究銅鑼灣歷史，原來佢係老街坊，住喺百德新街超過五十年，最難忘以前嘅避風塘，不時坐住架艇仔，食住避風塘炒蟹望日落，不知幾咁浪漫。
卓妮