咦咦咦，一落台即刻雞咁腳遠走高飛嘅曾蔭權終於回巢咯喎。本報記者發現呢個過氣特首同佢老婆鮑笑薇鬼祟現身，喺中環堅尼地道前任行政長官辦公室逗留七粒鐘，再以不足十秒登上門外等候嘅座駕，然後極速快閃。
貪腐醜聞纏身嘅曾蔭權爵士因乜事幹選擇呢個時候返香港呢？首先，應該係為咗過中秋啦，雖然佢有名你叫氣候逃犯啫，之但係唔會逃到錯過一家團聚嘅中秋佳節啩。其次咯喎，九月尾回巢證實東方報業集團早前嘅報道堅過石堅，貪曾卸任之後必須遵守禁令，立法會九月九日投票選舉之前不得留於香港暗中搞鬼，容乜易搞亂檔攤o架。
由堂堂爵士淪落為雀屎，貪盡海陸空又歎盡省港澳嘅曾蔭權將會有乜嘢下場呢？功夫茶真係唔知道已經開咗檔案嘅廉政專員公署調查成點囉，只係知道一件事，假如一個貪官冇得到法律制裁，小市民係冇可能順氣嘅，分分鐘因為貪官得到包庇縱容而怒不可遏。你知啦，香港嘅群眾運動愈來愈激動，萬一放生貪曾而觸發反政府怒潮，後果無法想像o架。總而言之八個字，水能載舟，亦能覆舟。
聽講喎，廉署至今仍然未邀請曾蔭權見面，不過絕對唔會就此罷休，總之傳媒報道過嘅都會查，並且已將調查層面擴展至貪曾全家，以及與連串事件有關嘅政商界名人，相信貪曾飲咖啡只係遲早嘅事。
廉署調查貪曾涉嫌嘅罪行多達十幾項，例如今年二月，東方報業集團直擊報道煲呔豪遊澳門，拍住老婆同富商喺三艘總值四億元嘅超級遊艇吃喝玩樂，仲要過夜宿一宵添。貪曾另外又多次同商界猛人乘搭私人飛機，飛去泰國布吉同日本玩餐飽。當然啦，欲壑難填嘅曾爵士唔會放過入住「豪華廉租屋」嘅機會，企圖以特廉優惠租住深圳東海花園超豪複式單位。
好嘞，功夫茶真係好想問一問廉署，幾時做嘢？點樣做嘢？有冇決心做一單大鑊嘢？咁講啦，曾爵士嘅存在就好比廉署門外多咗一坨雀屎，你唔將佢掃乾掃淨搞衞生，非常之咁唔啱數啫，吓話？
唔好唔記得喎，審計署發表過報告，踢爆曾蔭權亂花公帑。原來貪曾五年任期之內總共外訪五十五次，花費公帑一千二百萬元，當中有四十一晚入住當地最豪華酒店嘅最頂級套房。至於防止及處理潛在利益衝突獨立檢討委員會，發表嘅報告明言特首不應凌駕於法律之上，建議將《防賄條例》第三條及第八條涵蓋特首，未得許可索取或接受利益均屬犯法。
總而言之，貪曾回巢過中秋，雀屎不掃人人愁，廉署食完月餅好開工喇！