梁振英有金句：「香港人會怕老婆，唔會怕政府。」之不過，睇咗同文「好人沒有好報」，港人睇嚟最怕打官司就真！
公道自在人心，《東方日報》贏官司輸訟費，當司法利劍，不是用來懲惡鋤奸，而係變成賞惡罰善，信義已死，講「法治」就真係講多無謂，食多會滯！講真，如果唔係好似東方咁嘅正義傳媒，嫉惡如仇，擇善固執，為討回清白、公義，不惜花費龐大的人力、物力、財力去爭回一口氣，普通市民根本對所謂討回「公道」，只能望衙門興嘆！
啲法律學者成日話：法治係香港成功嘅重要支柱，亦係港人珍惜同埋努力捍衞嘅「核心價值」之一。法治不單要求法律嘅內容應符合公義嘅標準，更要求法律嘅執行、解釋同實施合乎程序正義嘅標準。
「合乎程序正義」？《明報》誹謗東方罪名成立，法庭判賠償一百八十萬元，上訴庭將賠償額大幅削減至二十萬，劉夢熊詰問得好：高院原訟庭裁定的一百八十萬元賠償額就「違反法律原則」嗎，既然沒有違反，為甚麼不按原訟庭訂的賠償額？所以，終院的裁決存在邏輯上的矛盾！
CY話港人會怕老婆唔怕政府，睇過東方單Case，老朽但知老婆不必怕，只要學胡適的「新三從四德」：太太出門要跟從，太太命令要服從，太太說錯要盲從；太太化妝要等得，太太生日要記得，太太打罵要忍得，太太花錢要捨得。如此做老公，只怕老婆愛你三百六十年還嫌少！CY的金句，依我看，應糾正：港人怕訴訟，唔怕老婆，更唔怕政府！