政情：立會紀念品 錄百萬生意額
立法會新大樓啟用後增設導賞團服務，吸引大批市民遊覽參觀，唔少人臨走時都想買番啲同立會有關嘅紀念品做手信，令大樓內嘅紀念品店生意大增，開張短短七個幾月已錄得過百萬元生意額，平均每月銷售額有成十五萬。當中以新大樓做主題嘅郵票同紀念封產品最受歡迎，至今已賣出過萬套，印有新大樓圖案嘅鑰匙扣同磁石貼亦售出超過六千個，立會筆記簿等文具賣咗超過三千份等。
立法會秘書處話，呢間紀念品店係以非牟利形式運作，各種紀念品訂價旨在收回成本同營運開支，唔係為咗賺錢。其實秘書處可以發揮創意，透過增加紀念品嘅種類為立法會開源，例如販賣「長毛」梁國雄用過嘅紙製棺材、坦克及氦氣球；工聯會王國興日以繼夜、夜以繼日咁寫落嘅反拉布墨寶；仲有立法會主席曾鈺成簽名嘅「剪布」專用金鉸剪、用立法會點算出席人數鐘聲製成嘅鬧鐘等，包保令立法會豬籠入水。