政情：柯大俠設宴 親自搬紅酒
思捷環球周三公布全年業績，同一晚董事會主席柯清輝（柯大俠）就喺跑馬地馬場訂咗兩圍枱，宴請公司一班外籍高層，畀佢哋見識吓香港賽馬文化，副主席鄭明訓、新任行政總裁馬浩思（Jose Manuel Martinez）及即將卸任行政總裁嘅范德施都有出席。當晚柯大俠好熱情咁招呼自己友，仲做埋「阿四」，親手捧住一箱十支法國紅酒入廂房，都有成十磅重o架，認真唔話得。
早排思捷環球畀競爭對手高薪挖角，唔少高層連環「跳船」，范德施又辭任行政總裁，搞到柯大俠頭都痕埋，最後終於搵到西班牙籍嘅馬浩思頂上。柯大俠話，今次高層們來港，順道視察香港環境，食完餐飯之後，就要飛返所在工作崗位繼續奮鬥，唔怪得佢拎埋紅酒去飲個痛快喇。佢宴客嘅Louis Latour紅酒產自法國布根地，價值幾百蚊唔算貴，但評酒家就有唔錯嘅評價。