政情：謝偉俊變百搭後補王
立法會委員會爭奪戰進行得如火如荼，但建制派及泛民主派就大部分委員會正副主席人選仍未協調成功。目前除咗財務委員會及保安事務委員會主席之位爆爭奪戰外，建制派內部亦憂慮政府帳目委員會同司法及法律事務委員會嘅主席暫定人選，唔排除物色之前未做過任何委員會正副主席嘅謝偉俊（Paul）頂上，所以阿Paul將成為幾個委員會嘅百搭大後補。
之前我哋講過，政府帳目委員會主席由地產及建造界石禮謙（大舊石）擔任，但有議員擔心會出現角色及利益衝突，損害帳委會嘅公信力。呢個質疑傳出後，據聞大舊石就私底下向部分建制派議員表明只會做一年主席，之後三年就會由阿Paul「替補」做主席。此舉大舊石可以好輕鬆咁喺議會內繼續優哉游哉，一來唔使再聽埋啲閒言閒語，二來可以保住名聲。
多個委員會渴求人才
至於司法及法律事務委員會主席一職，多年來一直係法律界議員嘅囊中物，雖然梁美芬一早表明心迹想做主席，但近日傳出有建制派中人不滿美芬嘅法律知識太過學術層面，於是建議擁有事務律師資格嘅阿Paul代替美芬，迎戰可能代表泛民上陣嘅法律界新丁議員郭榮鏗。不過，阿Paul尋日話自己性格唔鍾意同人爭，如果美芬堅持要做主席，佢亦唔會過分強求喎。
講到保安事務委員會，自從新民黨主席葉劉淑儀表明無意角逐主席後，令泛民涂謹申幾近可以順利做主席，建制派為咗唔想泛民勢力過大，可能會派出一早表明有興趣做副主席嘅阿Paul出任。不過，根據建制派內部嘅協調機制，做邊個委員會職位並非全權由個人決定，如果有人力勸阿Paul上場做主席，阿Paul都未必咁容易推得成。按照依家咁多個委員會極度渴求人才嘅情況，阿Paul不妨諗清楚，否則揀錯咗，嚟緊幾年未必好過。