中環出更：唐楚男 蔡克昭 細說張大千「情義」
唐、蔡兩位律師相交三十年，喺工作上合作無間，呢份情誼得來不易。佢哋展出嘅張大千畫作同樣得來不易，因為張大千嘅大部分畫作都用作饋贈兒孫親屬、摯友及同業，所以要收集呢批名作，非單單有錢就搞得掂。張大千係重情輕利之人，「吾畫之最佳者，只送不賣」呢句話令兩位律師深深感動，所以佢哋以「情義之交」為畫展命名，紀念大千有情有義。
大師樂助同業渡難關
除咗情義，張大千仲好有智慧，話說好多人都會攞番張大千嘅舊作去問大師本人辨認畫作真偽，通常大師會先問對方畀咗錢未，如遇上被人臨摹嘅畫作，就會叫對方唔好買，買咗嘅話，大師就會喺畫作上面加多兩筆，變成真品。過年過節，大師遇有生活艱難嘅同業拜年，為免對方難堪，大師會等對方離開後，再叫仔女攞封大利是畀對方過年。亦有潦倒嘅同業嚟搵大師合作，大師都來者不拒，總之幫得就幫。
至於兩位律師可以擁有咁多張大千真迹，原來全靠張大千好友沈葦窗雅讓畀佢哋，沈先生仲教佢哋點挑選畫作精品，好似其中一張只有賀卡咁大嘅「二童子圖」，據講畫緊大師一個好朋友嘅兩個兒子，呢幅作品無論喺筆功、構圖、意境都被喻為精品，加上一份故友情誼結，所以大師晚年都好掛住呢幅畫。依家好多內地投資者都愛買大幅嘅畫作，但唐律師就有一個小貼士，就係要求精不求大。
卓妮