考考大家，香港嘅夏天有幾凍？各位可能會話，食月餅食懵咗咩，香港嘅夏天只有熱熱熱熱熱，點會問人有幾凍o架！
如果大家真係咁諗，功夫茶問多一次，香港嘅夏天室內有幾凍？對於呢個問題，相信各位唔會再質疑功夫茶食得太多月餅喇啩。
冇錯嘞，香港嘅夏天確係好鬼死凍o架，隨時凍到打冷震。有時真係唔明香港人個腦係點樣運作嘅，冷氣機有冇必要搏老命開到最勁呢？你開車都唔會下下踩盡油去到時速二百公里啦，冷氣機開到最勁一來凍到騰騰震，二來浪費電力，好唔環保啫。
環保團體綠色和平做過一項研究，尖沙咀及銅鑼灣六個大型商場抽樣讀取七百二十個溫度數據，結果發現只有五個樣本符合政府建議嘅二十五點五度。呢六個商場超過九百個商戶之中，超過七成唔會喺商場關門之後熄燈。簡單咁講，六個大型商場嘅冷氣溫度過低，超過七成嘅抽樣讀數都低於攝氏二十四度。
綠色和平資深項目主任古偉牧就話嘞，大型商場使用累退式電費計算，又為租戶提供一口價用電優惠，令佢哋冇動機節約用電。綠色和平要求兩間電力公司承諾年底加價之前，引入累進式電費計算制度，並且凍結低用量住宅及小商戶嘅電費，藉此鼓勵慳電。
其實唔止商場係咁o架，連幾間大學都有違環保原則。環保觸覺接獲多宗低溫投訴，香港大學百周年校園陰風陣陣，其中鄭裕彤教學樓多個樓層嘅走廊氣溫只錄得攝氏十八度，香港中文大學伍何曼原樓嘅走廊亦錄得攝氏二十度低溫。
喂，冷氣長開又溫度過低，以今時今日嘅環保標準而言，唔話你賤格都唔得啦。你知啦，冷氣機吹向室內就話冷氣啫，排出室外就係暖氣，造成嘅熱島效應影響深遠。至於浪費電力呢家嘢，更加係污染空氣嘅一大元兇，事關一發電就等於排放廢氣。
其實講到尾，都係特區政府嘅環保政策太失敗，結果累人累物累街坊。記唔記得前特首曾蔭權爵士被稱為「氣候逃犯」呀？正正由於蔭權七年一事無成，香港嘅空氣污染長期惡劣，市民嘅環保意識亦冇提高，硬係以為長開低溫冷氣係夏天不可或缺嘅指定動作。
冇錯，政府係就係建議冷氣溫度二十五點五度，之但係有冇以身作則呢？淨係以貪曾時代嘅禮賓府為例，每月電費居然二十萬元，足足係一個普通家庭嘅二百倍，嗰種嘥電嘅兇狠作風，簡直令人覺得賤格到暈囉！
新任環境局局長黃錦星最近多咗一個副局長陸恭蕙助其一臂之力，功夫茶想問，閣下唔會係氣候逃犯二號啩？係就唔該由陸小姐坐正！