都說我們活在資訊科技發達的時代，某新一代智能手機甫開售，首日已賣出逾二百萬部，同文呼籲「棄用血汗智能手機」，老朽恐怕他多半要落空！眼前吾女一日機不離手，老爸我不禁探問之：一早起床發現不見了手機，有乜反應？答曰：比死更難受！那語氣比步入教堂說「我願意」時更堅定千倍！
科技資訊無疑改變世界，老朽為人之患時，起初只係「粉筆加口水」，即所謂chalk & talk，如是者，誤人子弟二十多年，其後啲校長主任視課，個個老師都要做PowerPoint，好似冇咗佢嗰堂就係失敗！老朽堅持chalk & talk，結果總被指追唔上步伐，次次考績都係勉可合格。
最近，瑞士成立的「反PPT黨」（Anti PowerPoint Party）根據佢哋嘅調查數據，觀看枯燥無味嘅PPT報告，發現每年會給歐洲造成一千一百億歐元嘅損失，可見PPT睇多咗會令人生厭。老朽每見啲老師，一話校長睇堂，無不忙於製造「精彩繽紛」嘅PPT，而唔係努力搜集資料，多作分析，本末倒置，講咗大半堂，既沒有Power，又沒有Point，令人感嘆！新一代追求科技無可厚非，但被新型號手機搞到如癡如醉，手不釋機而沒有人手不釋卷，呢個現象令老朽擔憂。
有文章稱，我們通訊愈多就愈孤獨，得到一個地球村，卻居住在一個毫無生氣的死胡同裏，以及無邊無際的訊息高速公路的曠野中。老朽不想活在虛擬世界，一於熄機，想像牟宗三《五十自述》所說：「人生總是西風、古道、瘦馬，總是野店裏求安息。」