政情：陳岳鵬最快交利益申報表
政府喺呢個月十二日再公布咗新一批、一共五位副局長同政治助理嘅任命，不過原來斬件上枱嘅唔單止喺公布任命，連上任後嘅利益申報都係斬件出台，即係話問責團隊嘅利益申報都係「成熟一項推一項」。
喺呢五位副局同政助中，目前只係得政制及內地事務局政助陳岳鵬（Ronald）交咗申報表。至於點解Ronald嘅申報可以咁快「成熟」出台，喺埋位後一星期內交到功課？佢笑笑口話自己無咩家當要申報，只得個自住單位，佢強調單位無僭建。
不過唔講唔知，原來Ronald係香港工商專聯會嘅董事，不過佢就話呢個組織好鬆散，只係幾個中央政策組兼職顧問喺○九年搞嘅一個討論社會議題嘅平台，仲話聯會由組成至今都無搞過活動，只係有其他成員不時用個人名義寫下文咁，而佢喺接到政助一職後亦即刻辭去聯會董事一職，之不過申報嘅時候有關辭任程序仲未做晒喎，為咗保險啲所以當日咪照申報住先囉！