政情：馬逢國有聾耳 唔怕人大聲
尋日我哋寫過，新一屆立法會嘅建制派議員喺編排會議廳座位表時，故意圍住人民力量同社民連嘅「掟嘢四人組」嚟坐，死守主要官員出入嘅走廊位，齊做人肉屏障幫政府護駕。不過，要做到一個神奇超卓嘅忠心屏障，單會「接蕉擋茄」絕對唔夠，最好有埋隔音功能，講到消音，候任體文界議員馬逢國絕對有潛質！
馬逢國未來四年會坐喺建制派邊境，右邊正係出名大聲夾惡嘅人民力量陳偉業，但佢就自恃有聾耳一隻，揚言無有怕。馬逢國尋日自爆，佢喺九十年代兩度因潛水整穿耳膜，目前右耳只得番八成聽力，佢又話將來開會嘅時候，如果有嘢佢唔鍾意聽，就直情會當聽唔到添。曉得任意消音，是為神奇超卓。
建制派人肉屏障築成，一場立法會主席口水戰亦即將展開，建制代表有角逐連任嘅民建聯曾鈺成，泛民方面，過去兩屆都係由第一大黨民主黨擔任呢個「挑戰者」角色，不過白鴿黨選舉失利後，決定唔再喺立會當頭，最後揀無可揀下，就搵咗公民黨黨魁梁家傑頂上。不過無論泛民派邊個都好，最後都係輸。