政情：林鄭喺元朗買老店月餅
政務司司長林鄭月娥好打得，不停示範如何一心多用，例如佢禮節性拜訪北京，臨走前都去吓故宮博物館，睇睇博物館能否每年借出一次展品嚟香港展覽。佢尋日去元朗同區議員會面，又「順便」去咗一間老餅家大同，買啲月餅，幫老闆打打氣。
尋日林鄭同區議員會面，討論天水圍墟市、對外交通配套等議題後，就靜靜雞去咗該區有名嘅大同老餅家，當時大同第二代傳人謝禎原，以及第三代傳人謝興之都喺度，見到貴客到臨，都覺得好驚喜。林鄭走入店內，買咗豆沙雙黃月同五仁金腿月各一盒，都係好傳統嘅月餅，又買咗大量豬籠仔餅送畀小朋友。臨走前，林鄭同餅店謝老闆講，話自己好鍾意傳統嘢，叫佢哋畀心機做落去。
講開呢間餅店，係元朗區最耐歷史嘅餅店，已經創立逾六十年，以月餅、唐餅食品最受歡迎，當中唔少人都鍾情佢嘅五仁金腿月，不油不膩、甘香可口，林鄭真係識食。