政情：富議員冷待利益申報
立法會秘書處一連四日為候任新議員舉辦俗稱「雞精班」嘅工作坊，等佢哋可以盡快掌握立法會運作。立法會議員早前接連被揭漏報利益，尋日嘅工作坊就教新議員點樣申報個人利益，不過全日出席嘅新貴得十七位，佔卅五個首次加入立法會大家庭加翻叮議員總數唔夠一半。特別嘅係，一眾候任富議員尋日都缺席，唔通佢哋匿埋喺屋企，數清楚有幾多間屋同公司？
尋日無出席嘅候任議員，包括身家豐厚嘅新界西田北辰、九龍西蔣麗芸同建築測量及都市規劃界謝偉銓等，金融服務界張華峰亦早退，令人擔心佢哋唔聽清楚介紹，申報時會有所遺漏。公共專業聯盟梁繼昌同新民主同盟范國威（Gary）都有出席，佢哋話自己擔任公職同擁有嘅物業數目唔多，申報時都幾輕鬆。Gary仲講笑話可以照住佢張區議會申報表格慢慢抄，又話同其他腰纏萬貫嘅議員相比，自己算係「兩袖清風」嘅一群。「無殼蝸牛」公民黨陳家洛就話由於自己無買任何物業，所以得番大學教席同五個仔女要申報喎。
今屆改為面向同僚宣誓
另外，喺十月十日首次立法會大會上，七十位議員將會進行宣誓儀式，之後就會即場進行主席選舉。據聞今次因為新人多，淨係宣誓都要兩個鐘頭，為免七十人齊齊罰企，今次喺議員企喺度宣誓嘅同時，其他人可以坐低，就算議員人有三急要行開去廁所，都無咁覺眼。
同以往唔同嘅仲有議員今次會面向同僚宣誓，同以前面向主席座位嘅做法有唔同。候任秘書長陳維安（Kenneth）就話，咁嘅安排除咗令議員面對公眾立下神聖承諾之餘，又可以等傳媒攞到最靚嘅拍攝角度，可謂一舉兩得喎。其實點做都問題不大，最緊要就係維持議會莊嚴。人民力量、社民連同工黨部分成員揚言會唔跟規矩讀誓詞，但為咗令新貴們喺宣誓時順順利利唔失禮，秘書處今日會有專人示範點樣走位同讀誓詞，先嚟個綵排，就萬無一失嘞。