中環出更：湯修齊三口子 歎沖繩豬肉
經過低溫高濕熟成（Aging）嘅牛扒，甚受嗜牛一族歡迎，唔少日本餐廳亦爭相推出熟成豬肉。日前卓妮行過紅磡火車站對面嘅置富都會商場，見到前博愛醫院主席兼皇后洋行董事總經理湯修齊（Henry），同埋太太Yvonne及囝囝Harris去梁山泊日本料理開餐，齊歎餐廳嘅招牌菜沖繩熟成豬肉。
Henry盛讚豬肉好好味，肉質鬆軟彈牙，別有一番滋味。餐廳經理阿Ken話，佢哋先將豬肉放喺一定溫度嘅環境，經過兩個星期熟成，所以肉質鮮甜有咬勁，然後以鐵板香煎，確保鎖住肉汁，難怪推出後就成為招牌菜。Harris最鍾意食火炙三文魚壽司，好味到要Encore。Henry爆料話，囝囝試過一次過食十九件火炙三文魚壽司，Harris就澄清話係廿一件！
熱心公益嘅Henry，最近升呢做圓玄學院副主席，爸爸湯偉奇就卸任主席一職。佢話，年底打算同太太去度假聖地關島過二人世界，當係獎勵太太一年嘅辛勞，認真體貼。
