中環出更：體操冠軍與名流傾生意也講健康
健康最重要，尋日健康快車舉行記者會，宣布與清水灣鄉村俱樂部聯合主辦一項慈善跑，健康快車創會主席兼籌委會主席方黃吉雯、清水灣鄉村俱樂部副主席王桂壎、健康快車基金理事會副會長黃帆風，仲有十六項世界體操冠軍兼○八年奧運金牌得主李小鵬一齊出席活動。體態健美嘅方黃吉雯會參加五公里慈善步行，佢話因為關節磨損，連上落樓梯都要小心，所以唔敢參加十公里慈善跑。每日都帶計步器喺身嘅佢，堅持每日步行一萬步，如果行唔夠就返健身室行埋佢，好有恒心。
王桂壎有參加其他十公里公開賽嘅經驗，四年前跑過第三，三年前跑過第二，不過做咗律師會主席之後就肥咗十八磅，依家要減磅唔係咁易，搞到做劇烈運動時膝頭都會隱隱作痛。尋日王太都有出席活動，仲攞住部iPad做老公個攝影師，王太笑言佢哋兩公婆呢排忙住病，王生星期五中午割完息肉出院，王太星期六就腸胃炎入院，護士未落班又要同佢哋打招呼。
黃帆風白手興家
已退役嘅李小鵬，依家有自己嘅生意，為跳水隊和體操隊的成員謀出路，找廣告代言，小鵬話做生意最難就係要搵生意，最希望賺到錢，至於依家邊個最高身價，佢就笑笑口話「你話呢？」果然有生意人本色。講開生意之道，黃帆風沙士時已入定工廈等發展，正考慮改變用途，由板間房住到依家四千呎南灣豪宅嘅佢，覺得不同年代有不同機遇，但佢話唔少新一代因家庭環境好，反不敢自立門戶，唔似得佢由零開始，衰咗可以返去住公屋再嚟過。
卓妮