嘩嘩嘩！弊弊弊！沙塵滾滾又殺到！
乜傢伙咁得人驚呢？講出嚟大家一定眼都凸，甚至條條頭髮豎起晒。嗱，講嘅係沙士瘟疫捲土重來，你如果話唔得人驚，功夫茶有理由懷疑你應該返火星囉。
話時話，火星有冇沙士病毒嘅呢？如果地球變得太危險而唔再適宜人類居住，移民火星不失為一個權宜之計，畢竟到咗世界末日嘅時候，恐怕連阿努瓦圖都唔係一個理想嘅避難所。
言歸正傳，因乜事幹殺人如麻嘅沙士病毒又會重出江湖o架？具體原因真係唔知道，只係知道有一個客觀現象，中東地區有人感染新品種沙士，目前造成兩人死亡一人危殆。世界衞生組織拉響警鐘通報全球，一名四十九歲健康狀況一直良好嘅卡塔爾籍男子，早前去過沙特阿拉伯旅遊之後突然發病，送去多哈嘅醫院深切治療部，出現急性呼吸道綜合症及腎衰竭。重病男子持續轉差，再由醫療專機送去英國治療。英國衞生防護局測試證實，病人感染從未見過嘅新型冠狀病毒。
面對殺你一個措手不及嘅病毒，英國方面對照荷蘭埃拉斯穆斯大學醫療中心嘅報告，發現卡塔爾男子對比另一名感染新型冠狀病毒死亡嘅沙特老翁，病毒有百分之九十九點五相似。世衞話喎，現時資料有限，未能確定新病毒殺傷力是否同○三年沙士相若，將會密切監察以及繼續追查，現階段不發出旅遊限制。
呢嗱嗱嗱，問你腳仔軟未？香港作為○三年沙士肆虐期間死亡率最高嘅城市，真係猶有餘悸o架。回想當年，內地以及本地笨蛋官僚一個二個既遲鈍又反智，中國政府死瞞爛瞞之下，沙士病人冇遮冇掩越境達陣，一到咗香港就四處播毒，搞到牛頭角淘大花園淪為重災區。跟住落嚟全人類雞手鴨腳，應該隔離嘅唔隔離，應該封閉嘅唔封閉，結果一場沙士瘟疫害到香港死咗二百九十九人，其中包括盡忠職守捨身成仁嘅醫護人員。唉，功夫茶諗起一人一口罩嘅世紀悲情都眼濕濕呀，該煨！
正所謂咯喎，經一事，長一智，家陣改朝換代已經唔係董建華或者曾蔭權打骰嘞，梁振英新政府有冇辦法防範沙士來襲呢？卡塔爾同沙特阿拉伯唔係好遠o架咋，地球一體化之下，以前覺得山長水遠嘅地方已經變得近在咫尺，如果食衞局、醫管局以及衞生署等等官僚學似前朝舊時，香港睇怕又要經歷另一次浩劫。
咁講啦，沙士出沒注意，防疫莫再遲疑，負責把關嘅政府部門唔可以重蹈覆轍掉以輕心。記住，香港骨灰龕位長期供不應求，瘟疫殺人一個都嫌多！